ليه ربنا خلق لنا عينين مش عين واحدة .. مثلا يعني ؟؟؟!!!

ليه ربنا خلق لنا عينين مش عين واحدة .. مثلا يعني ؟؟؟!!!
و الله انا قعدت افكر شوية كتير في الموضوع ده و تخيلت الناس اللي فقدت بصرها في عين و العين التانية شغالة .. يا تري ابصارهم للأشياء و من ثم فهمهم للمعاني و تفاعلهم معها بيكون منقوص و مش زي اللي بيشوفوا بعينيهم الاتنين ؟؟
من وجهة نظري ان غالبيتنا عند رؤيتين مختلفتين بعنيه الاتنين و نصفي مخه شغالين في طريقين مختلفين كل واحد يتبع عين من العينين و في الآخر ينتج فوضي في الفكر و التصرف و ازدواجية في المعايير يعني واحد يشوف بعين الحاجات اللي نفسه فيها و بالعين التانية يشوف حاله المهبب فنص مخه الاول يشتغل و يعشمه و نص مخه التاني يهبطه و يحبطه و هكذا .. و للحديث بقية

ليه بنعيط اول ما نتولد ؟؟؟؟

الاجابات التي وصلت كلها اجابات كلاسيكية و طبيعية لكن انا غرضي من الاسئلة ان اعرف افكار الاجابات الغير تقليدية و انا اللي ح ابدأ حسب ما بافكر ..

يا تري علشان الدنيا جوه كانت هدوء جدا و مرة واحدة حس بزيطة ما بين صراخ أمه و زعيق الدكتورة و و حشية الممرضة .. جايز
و لا يمكن علشان يا عيني مشفق علي ابوه من الفاتورة اللي ح يدفعها ... برضه جايز
و لا علشان اول ما فتح عينيه لقي قدامه وش الممرضة او بالأصح التمرجية في المستشفي الحكومي اللي أمه بتولد فيه علشان ابوه ما معاهوش فلوس المستشفي الخاصة ... وارد
و لا يمكن مزاجه اتعكنن علشان كان واخد تعسيلة جوه قبل الخروج مباشرة علشان الولادة كانت في الفجر .. ممكن
و لا علشان يلفت الانتباه اليه و بنبه اللي حواليه علشان يعملوا حسابهم في متطلباته ..
و لا حزين لأنه كان سماع خناق ابوه و امه طول ما هو جوه انهم عندهم اربعة غيره و ماكانش ده وقته فأحس انه ما لوش لزمة .. معقول برضه
طيب لو كتم في نفسه كل ده و قرر ما يعيطش .. يا عيني يلاقيني نفسه مضطر يعيط لأن الدكتور ح يجبره علي كده و كأنه بيوصل له رسالة غير مباشرة .. اول مشاعرك في هذه الدنيا لازم تبقي معاناة و حزن و لازم تجرب العياط قبل الضحك .. بداية مأساوية جدا
و لا احتمال كان عايز يجرب صوته .. اصله لو ضحك ح بيتسم بس من غير صوت لكن العياط .. ما أقولكش .. ح يفهم الدنيا كلها من الأول كده انه صوته عالي ..
آخر احتمال انه عرف مصيره لما ح يكبر ح يبقي ايه فقال أعيط من الاول .. احتياطي يعني ..
بالمناسبة .. طبيا بعيط لأنه أول تمدد للرئة ح يحصل لما ياخد أول نفس .. علشان كده بيعيط .. اكيد طبعا الهواء ملوث

ليه ؟؟؟؟؟!!!!!

لكوني تلميذ صغيور في عالم المدونات .. يمكن يطلع دمي تقيل شوية لأني مش محترف قوي .. و لكني دخلت علي مدونات أخري لأناس أفاضل و حاولت اغوص في مفهوم و طريقة عرض افكارهم علي اختلاف انواعها و توجهاتها و حاولت ان اصنع لنفسي شخصية شبه مستقلة .. يعني مش ح استعرض فيها مواهبي من زجل عامي او شعر فصحي و لا ح اسرد فيها مواقف شخصية حياتية يومية او تعليق علي احداث هامة او تخيل روايات جميلة و مسلية او إفراز لكلام في نفسي مش لاقي حد اقوله له مع ان ده كله شيء جميل جدا .. كمان لاحظت ان معظم التعليقات سلبية اي انها لا تخرج من كونها سوي المجاملات او راي كاتبها فيما قراه و ده مش كفاية

فقررت ان يكون دخولي في هذا العالم الجديد و الجميل من باب آخر .. باب تفاعلي نشط استطيع فيه ان احقق توسع في افكاري و مداركي و استلهم اشياء لم تكن ببالي من خلال تعليق او اجابة من يقرأها ..

طولت .. انا عارف .. باختصار .. انا ح اطرح العديد من الاسئلة و معظمها كلنا شافه او عاشه او قابله او قراه .. يعني مش جديد .. لكن الجديد هي الاجابة بس تكون بعمق و بصراحة و سنكتشف سويا ان كل واحد عنده اجابه و اللي ما يلاقيش اجابة يسال او يقرأ في مصادر مطلعة او يقعد مع نفسه قاعدة صادقة علشان يعرف الاجابة .. و سنفاجأ بأن البعض منا سيردد .. " ايوه صحيح هو ليه كذا و كذا "

• ليه بنعيط اول ما نتولد و اللي ما يعيط لازم الدكتور يخلليه يعيط ؟؟؟


• ليه بتحب امك ؟؟ يعني لو اكتشفت بعد عشرين سنة انها مش امك اللي حملتك و رضعتك لكن هي اللي ربتك ح تفضل تحبها برضه ؟؟


• ليه البنت او الست بصفة عامة بتقعد قدام المرايا كتير تظبط في شكلها و في لبسها قبل ما تخرج بالرغم انها ما بتشوفش نفسها و هي ماشية في الشارع ؟؟؟
• ليه لما تقابل صاحبك بعد سبع او تمن سنين تخرج من الجامعة لازم تسأله انت اتجوزت و لا لسه و لو قال آه لازم تساله و معاك كام عيل ؟؟؟؟
• ليه اباء و امهات كتيرة تعليمهم متوسط او عادي و مصرين يدخلوا اولادهم مدارس لغات ؟؟؟
• ليه الناس بترتشي و ليه الناس بترشي ؟؟؟
• ليه بتحب مراتك - ان كنت بتحبها ؟؟ و هل بتحبها من اول يوم قررت فيها تتجوزها ؟؟
• ليه بتحبي زوجك .. ان كنتي بتحبيه ؟؟ و هل بتحبيه من اول يوم وافقتي انك تتجوزيه ؟؟
• هل ممكن تحب تاني غير مراتك ؟؟ و هل ممكن تحبي تاني غير زوجك ؟؟
• هل توافق انك تكون زوج لاحق لزوج سابق ؟؟
• هل توافقين ان تكوني زوجة تانية ؟؟
• ما هو الأفضل .. الصبر علي حياة صعبة و تعيسة مع زوج او زوجة أم الطلاق أم الانفصال فقط ؟؟؟
• ما هو تعريف الغيرة لدي الزوجة و تعريفها لدي الزوج ؟؟
• تعمل ايه لو اكتشفت في اول حياتك الزوجية انك لا تستطيع الانجاب ؟؟
• تعملي ايه في اول حياتك الزوجية لو عرفتي ان زوجك له تجربة سابقة و ما زالت مؤثرة فيه ؟؟ و نفس السؤال للزوج ؟؟
• ما الفرق بين البخل و الحرص في الانفاق ؟؟
• ما الفرق بين التردد و التمهل في اتخاذ القرار ؟؟؟
• كم مرة عملت مجاملة لأحد و انت مجبر عليها ؟؟؟
• كم مرة كان عندك راي في أحد و انت بتعامله بطريقة مختلفة عن رأيك فيه ؟؟
• يا تري ما هي حجم الغيرة لدي المرأة علي زوجها من أمه و اخواته ؟؟؟
• ليه بتصرف علي ابنائك في تعليمهم مبالغ رهيبة و انت مدرك تماما انهم لن ينالوا فرصتهم لمجرد انهم متعلمين كويس ؟؟
• هل بتفكر تجيب شقق لاولادك ؟؟ و ليه و ازاي ؟؟
• ما هي أوجه المتع التي تتمتع بها بعد خمس سنين زواج ؟؟
• ما سر الابتسامة الرهيبة التي ترتسم علي وجه من يلحق بالاتوبيس و هو ماشي بعد السواق ما هدأ السرعة له ؟؟
• لماذا يبتهج الزوج و الزوجة عندما يسمعان خبر الحمل لأول مرة ؟؟
• ليه بنعمل جمعيات طول السنة علشان نطلع نصيف ؟؟؟
• يا تري ايه شعورك لما بنت تدخل تسلم علي اتنين زمايلها في الكلية واقفين معاك و ما تعبركش انت مع انها شايفاك ؟؟ و نفس السؤال للبنت ؟؟

كفاية كده و نكمل بعدين بعد ما نجاوب ... الجاي اكتر

الحافي لحظة ما اتولد .. كان بيقول ايه؟؟؟

الدنيا ضلمة و الجو عتمة و انا عمال اتشقلب في ال amniotic ( الامنيوتك = السائل المحيط بالجنين )
قلبي من الرعب ح يضمر و يبقي atrophic ( اتروفك = ضامر )
صرخت و قلت يا ناس .. ما بقاش فيه احساس ..
اتحبس انا جوه uterus و الدكتور علي محرص .. ( يتيراس =رحم )
صرخت و قلت العون و الغوث ... هاتولي forceps او ventous ( فورسيبس أو فينتوس = جفت أو شفاط )
و فعلا الدكتور استجاب .. و جري علي الforceps و جاب
و قعد يلف بي و يدور و ال shoulder جوه محصور ... و بعدين بقيييييييييييي ... ( شولدر = مفصل الكتف )
رجعت ورا اتخبط في عمود .. لقيته ال umblical cord ( امباليكال كورد = الحبل السري )
اتزحلقت عليه لحد ما وصلت لل cervix و قعدت اضرب برجلي عليه زي البونجز ( سيرفيكس = عنق الرحم )
و فجأة لقيت بصيص من نور ... و ال memberans بدأت تدور .. ( الميمبيران = الاغشية المحيطة بالجنين )
قلت يا رب بقي ت rupture و اخرج بقي و اتحرر ( رابتشر = تنفجر )
و فعلا ruptur ت ... و العتمة نورت
و ببركة ربنا .. اتزحلقت أنا .. و خرجت للنور
عيل تخين و أمور ..
رفعني الدكتور من رجليا ... زي السمكة اللي خارجة من الميه
و حسيت بتيار هوا شديد ... يا بااااااااااي ... ح يفرقع ال alveoli ( الفيولاي = الحويصلة الهوائية بالرئة )
اخذت زفير و شهيق .. و استغرقت في نوم عميق .. مستني الحياة الجاية